ළමා ශ්‍රමය පිටුදැකීම පිළිබඳව මාතර දිස්ත්‍රික්කයේ පොලිස් නිලධාරීන් දැනුම්වත් කෙරේ

ජාත්‍යන්තර ළමා ශ්‍රමය පිටුදැකීමේ දිනයට සමගාමීව ළමා ශ්‍රමය පිටුදැකීම පිළිබඳව මාතර දිස්ත්‍රික්කයේ පොලිස් නිලධාරීන් දැනුම්වත් කිරීමේ වැඩසටහනක් මාතර අතිරේක දිස්ත්‍රික් ලේකම් කසුන් එස්.කේ.වැල්ලහේවා මහතාගේ ප්‍රධානත්වයෙන් පසුගියදා මාතර දිස්ත්‍රික් ලේකම් කාර්යාලීය ගාමිණී ජයසේකර ශ්‍රවණාගාරයේ දී පැවැතිවිණි.

ජාත්‍යන්තර මට්ටමින් සැලකූ විට විශේෂයෙන් දියුණු වෙමින් පවතින රටවල හා නොදියුණු රටවල පාසල් යා යුතු වයසේ ළමයින් ශ්‍රම වෙළඳපොල තුළ ඉතා අවම මිලකට සූරා කෑමට ලක්වෙමින් පවතින අතර ශ්‍රී ලංකාවේ මෙම තත්ත්වය කෙබඳු ආකාරයකට ක්‍රියාත්මකවේද? ඒ හා සම්බන්ධ නීති රෙගුලාසි මොනවාද? පොලිස් නිලධාරීන් වශයෙන් ශ්‍රී ලාංකේය ළමා පරපුර ආරක්ෂාකර ගැනීම සඳහා ඇති වගකීම කවරේද? ආදී ක්ෂේත්‍ර ගණනාවක් ආවරණය වන පරිදි මෙම දැනුම්වත් කිරීම සිදු කරන ලදි.

ජාතික ළමා ආරක්ෂණ අධිකාරිය මගින් දීප ව්‍යාප්තව පොලිස් නිලධාරීන් 2500 දෙනෙකු දැනුම්වත් කිරීමේ වැඩසටහන් මාලාවේ මාතර දිස්ත්‍රික් වැඩසටහන සඳහා සම්පත් දායකත්වය සපයන ලද්දේ මාතර දිස්ත්‍රික් සහකාර කම්කරු කොමසාරිස් තිලක් දේශප්‍රිය මහතා විසිනි.

මේ අවස්ථාවට මාතර අතිරේක දිස්ත්‍රික් ලේකම් නදී ජයවික්‍රම මෙනෙවිය ඇතුළු රාජ්‍ය නිලධාරීන් හා මාතර දිස්ත්‍රික්කයේ සියලුම පොලිස් කොට්ඨාස නියෝජනය වන පරිදි පොලිස් නිලධාරීන් 100 ක පිරිසක් සහභාගි වී සිටියහ.

ජාතික ළමා ආරක්ෂණ අධිකාරියේ මූල්‍ය ප්‍රතිපාදන මත ජාතික ළමා ආරක්ෂණ අධිකාරිය හා මාතර දිස්ත්‍රික් ලේකම් කාර්යාලය එක්ව මෙම දැනුම්වත් කිරීමේ වැඩසටහන සංවිධානය කළ බව මාතර දිස්ත්‍රික් ළමා ආරක්ෂණ නිලධාරී යූ.ජී.කුසුම්ලතා මහත්මිය හා මාතර දිස්ත්‍රික් මනෝ සමාජීය නිලධාරී එස්.බී.එම්.බී.නවෝදනී මහත්මිය පැවසූහ.

දකුණු පළාත් වෙළඳ හා කර්මාන්ත ප්‍රදර්ශනය අගෝස්තු 01 හා 02 දිනවල මාතර දී

දකුණු පළාත් වෙළඳ හා කර්මාන්ත ප්‍රදර්ශනය ගාල්ල, මාතර හා හම්බන්තොට යන දිස්ත්‍රික් තුනම කේන්ද්‍රකර ගනිමින් අගෝස්තු මස 01 සහ 02 දිනයන්හි දී මාතර උයන්වත්ත ක්‍රීඩාංගනයේ දී  පැවැත්වේ.

මෙහි ප්‍රධාන අරමුණ වන්නේ දකුණු පළාතේ සුළු හා මධ්‍ය පරිමාණ ව්‍යවසායකයන් සදහා පුළුල් වෙළඳ පොළක් හඳුන්වා දීම,අපනයන විභවතාවයෙන් යුත් කර්මාන්ත පුළුල් කිරීමෙන් අපනයන විවිධාංගීකරණයක් ඇති කිරීම හා දිර්ග කාලීන මිලදී ගන්නන් සම්බන්ධ කරදීම  ආදිය වේ.

මෙම වෙළඳ ප්‍රදර්ශනයේ මල් හා පැළ තවාන් අංශය, පාවහන් හා බෑග් නිෂ්පාදන අංශය, ඇගලුම් නිෂ්පාදන අංශය, ආහාර හා කුළුබඩු නිෂ්පාදන අංශය, විසිතුරු භාණ්ඩ නිෂ්පාදන අංශය, යන්ත්‍රෝපකරණ  නිෂ්පාදන අංශය හා විවිධ නිෂ්පාදන අංශය ඇතුලත් වව අතර ඒ සඳහා වෙළඳකුටි 130 ක් ප්‍රදර්ශන භූමිය තුළ ස්ථාපිත කෙරේ. ගාල්ල, මාතර හා හම්බන්තොට දිස්ත්‍රික් තුනම නියෝජනය වන පරිදි ව්‍යවසායකයන් 200 ක් සහභාගි වීමට නියමිත ය.

ජාතික ව්‍යවසාය සංවර්ධන අධිකාරියේ මූල්‍ය ප්‍රතිපාදන මත සංවිධානය කෙරෙන මෙම වෙළඳ හා කර්මාන්ත ප්‍රදර්ශනය සඳහා මාතර දිස්ත්‍රික් ලේකම් කාර්යාලය, කර්මාන්ත හා වාණිජ කටයුතු අමාත්‍යාංශය, මාතර මහ නගර සභාව ඇතුළු රාජ්‍ය ආයතන සම්බන්ධ වන බව ජාතික ව්‍යවසාය සංවර්ධන අධිකාරියේ මාතර දිස්ත්‍රික් සම්බන්ධීකරණ නිලධාරී චමරි ප්‍රියදර්ශනී මෙනෙවිය පැවසුවා ය.

රුපියල් මිලියන 12.5 ක වියදමින් ඉදිකෙරෙන 952 වන ජනඋදා ගම්මානය කිරින්ද පුහුල්වැල්ලට

නිවාස හා ඉදිකිරීම් අමාත්‍යංශය මගින් දීප ව්‍යාප්තව ක්‍රියාවට නංවනු ලබන ජන උදාන නිවාස ගම්මාන වැඩසටහන යටතේ රුපියල් ලක්ෂ 125 ක වියදමින් ඉදිවන 952 වන ජන උදාන නිවාස ගම්මානය මාතර දිස්ත්‍රික්කයේ කිරින්ද - පුහුල්වැල්ල ප්‍රාදේශිය ලේකම් කොට්ඨාසයේ තැන්නහේන ප්‍රදේශයේ ඉදිකිරීම සඳහා මුල් ගල් තැබීම පසුගියදා සිදු කෙරිණි.

  

ජාතික නිවාස සංවර්ධන අධිකාරියේ පූර්ණ අධීක්ෂණය යටතේ එකම සැලසුමකට අනුව අක්කර දෙකක භූමි භාගයක ඉදිකෙරෙන මෙම නිවාස ගම්මානය තුළ නිවාස 25 ක් ඉදි කෙරෙන අතර එක් නිවසක් වෙනුවෙන් රුපියල් ලක්ෂ පහ බැගින් නිවාස 25 සඳහා රුපියල් ලක්ෂ 125 ක් වැය කෙරේ. එම මුදල් ජාතික නිවාස සංවර්ධන අධිකාරිය මගින් නිවාස හිමියන් සඳහා ආධාරයක් වශයෙන් ලබා දෙයි. කිරින්ද - පුහුල්වැල්ල ප්‍රාදේශිය ලේකම් කොට්ඨාසයේ කිරින්ද මගින් පහළ ග්‍රාම නිලධාරී වසමේ නිවාස නොමැති මුස්ලිම් ජනතාව සඳහා මෙම නිවාස ලබා දීමට නියමිත ය.

මෙම මුල් ගල් තැබීමේ උත්සව අවස්ථාවට දකුණු පළාත් සභා මන්ත්‍රී බී.ජී.චන්දන ප්‍රියන්ත මහතා ඇතුළු දේශපාලන නායකත්වය, කිරින්ද - පුහුල්වැල්ල ප්‍රාදේශිය ලේකම් චින්තක අබේවික්‍රම මහතා ඇතුළු රාජ්‍ය නිලධාරීන් සහ ප්‍රදේශවාසී ජනතාව සහභාගි වී සිටියහ.